Col 1 | YML | STEP | Emavo, yau Faulo iada Timoti taiadi 'a vekaiwa 'waimie. Yaubada nuanuana, bega a vetomata'aulele Iesu Keliso faifaina, we'e 'omi emavo Yaubada 'ana todumwebika 'wa miamianiga 'atamana Kolose 'waineye, matatabuda Keliso taiadi ta miave'itubama. 'A vevelu'ui faifaimi, nuanuama Yaubada Tamada ma yana nuakalikali i na vevesauluva 'atumaina 'waimie wata nuanua bikana mia 'atumaina taiadi i na velevelemi.

Colossians 1

1 Emavo, yau Faulo iada Timoti taiadi 'a vekaiwa 'waimie. Yaubada nuanuana, bega a vetomata'aulele Iesu Keliso faifaina, we'e 'omi emavo Yaubada 'ana todumwebika 'wa miamianiga 'atamana Kolose 'waineye, matatabuda Keliso taiadi ta miave'itubama. 'A vevelu'ui faifaimi, nuanuama Yaubada Tamada ma yana nuakalikali i na vevesauluva 'atumaina 'waimie wata nuanua bikana mia 'atumaina taiadi i na velevelemi.

Faulo i vekaiwa Yaubada 'waineye me Kolose faifaidi.

3 Yama velu'ui 'waidie, tutuya fuedi 'a vevekaiwa faifaimi 'ada Toveimea Iesu Keliso Tamana 'waineye. Faifaimi 'a vevekaiwaga Yaubada 'waineye fai valami 'a nogai, yami vetumagana Iesu Keliso 'waineye fa'alina wata Yaubada yana tomotoga matatabudi 'wa nunuakalikaliedi. 5 Basenadi Iesu Valana 'Atumaina 'wa nogai, Valanina Yaubada yana Vona tonovina, nika bei 'wa nuani mogitana 'awaie 'ami veuveuta 'atumaidi 'wa na veluagadi Yaubada 'wainega. 'Ami veuveutanidi Yaubada 'akonadi i 'idewadi faifaimi, abame i 'eno'enovi, bega ma yami vetumagana faifaidi 'wa lulukamata. Naninidi 'wa nuani mogitana 'awaie 'wa na veluagadi, begaidi 'wa nunuakalikali wata 'wa vevetumagana. 6 Valanina Iesu faifaina basenadi 'wa nogaiga, wata i vevebwaika tomia fwayafwaya matatabudi 'waidie, 'atumaina wata ma vuagina. We'e 'omi Valananina 'wainega 'wa 'asetai mogitana 'akonadi Yaubada ma yana nuakalikali i vesauluva 'atumaina 'waimie, wata yana nuakalikalinina 'wa vebaemi. Tutuyanina 'wainega i maiga 'asiau Iesu Valana i vevebwaika 'waimie wata yami sauluva i veve'atumai 'wa da vo ma vuagina. 7 Yami 'asetanina Yaubada yana nuakalikali faifaina Efafila 'wainega 'wa nogai, iadanina todumwebika ta nuakalikalieni, ma fuema 'a vetofolova Keliso faifaina, taunina tutulima 'waimie. 8 We'e 'wa nuakalikaliga Yaubada 'Anu'anununa yana 'anivelena, wata faifaina Efafila i vonema.

S3 Efe 6:18S4-6 Efe 1:13,15 1 Fit 1:3-4

Faulo i velu'ui nuanuana me Kolose i na vetoketoke Keliso faifaina.

9 Valami 'a nogai bega tutuya fuedi 'a vevelu'ui faifaimi. Tutuyanina 'a nogai i maiga 'asiau kebu 'a da 'ailove 'a vevelu'ui Yaubada 'waineye faifaimi, naninidi Yaubada nuanuana 'wa na 'i'idewadiga, nuanuama 'wa na 'aseta-'atumaidi. Nuanuama 'Anu'anunu 'Atumaina nuanua 'anibwekabwekana i na velemi bega nani matatabuna 'waidie ma yami 'aseta 'wa na vevenua'ivina 'atumaina. 10 Naninidi i na velemiga, nika sauluvanidi 'Auvea yana tomotoga 'adi laubwaina 'wa na 'i'idewadi yami mia matatabuna 'waidie. Wata nani tulina tulina 'waidiega 'Auvea 'wa na kiavesosoani. 'Wa na vevesauluva 'atumaina nani tulina tulina 'waidie 'wa da vo yami mia ma vuagina wata Yaubada 'ana 'aseta i na vevebwaika 'waimie. 11 Wata 'a vevelu'ui faifaimi bega tutuya fuedi Yaubada i na kiavetoketokemi taunina yana toketokena magemagetana 'wainega, bega vita tulina tulina i na sousouyediga kebu 'wa na 'abiawa, 'wa na tokemaigemi wata ma yami sosoana 'wa na vevekaiwa Tamada 'waineye. 12 'Wa na vekaiwa Tamada 'waineye fai i 'ive'atumaimi bega 'ami fata 'ami veuveuta 'wa na veluagadi yana 'ai'aiwabu 'waidiega. 'Ai'aiwabunidi i 'idewadi yana tomotoga faifaida 'awaie yana 'Eba Veimea magemagetana nageneye i na veleda. 13 Tamadanina i 'ita'ita'ieda Seitani yana veimea dududubalina 'wainega i sidamaneda Natuna nuafouna yana 'isave'avina 'waineye. 14 Natunanina 'wainega Yaubada i tuveobuda sakona 'wainega wata yada sakonanidi i nuatavunidi.

S10 Fil 1:27 Efe 2:10S12 Efe 1:18-19S13 Efe 6:12
S14 Efe 1:7-8

Keliso wata yana folova ifufudi.

15 Keliso, siwe 'asa'aiana taunina Yaubada bani'odi, fai Yaubada kebu ta da 'ise'iseniga i vemageta Keliso 'wainega. Kelisonina Yaubada Natuna, 'eba velamu 'waineye taunina i miamia, Yaubada 'ana 'idewadewa matatabuda taunina 'ada to'edakumeta. 16 Taunina to'edakumeta fai 'wainega nani matatabuna tomotoga taiadi Yaubada i 'idewada. Naninidi abame wata fwayefwayeye, naninidi ta 'ise'isediga wata kebu 'ada fata ta na 'isediga, wata tomotoga bwaikidi abame, kumanidiavo anelose, tomotoga toketokedi wata toveimea tulina tulina. Taunidi nani matatabuna taiadi i souyedi Keliso 'wainega, taunina yana nuanua faifaidi. 17 We'e 'ana 'idewadewanidi bola kebu tamu i da souyeniga, Keliso 'akonadi i miamia, mulieta nani matatabuna i souyedi i 'a'avana i 'i'isave'avinidi wata i 'i'ivefa'alidi. 18 Wata Keliso yana 'Aila'a 'alo Tomogona i 'i'isave'avinida, taunina 'unu'unu. Taunina nagami wafayega i tovoi-vaitugana, begaidi 'ida Tomogona yawaida lamuna. Side bani'odi, nani matatabuna 'waidiega taunina 'aiseotogina i 'edakumetaotoga. 19 Fai Yaubada nuanuana, bega yana 'ai'aiwabu, yana toketokena, yana nuanua, wata yana sauluva matatabuna i 'eno'enovi Natuna 'waineye, kebu tamu ava'ai 'waineye i da 'usa, taunina mogitana Yaubada bani'odi. 20 Wata Yaubada i nuani, nuanuana Natuna yana wafa 'wainega 'ida 'ana 'idewadewa i na veianeda. Basenadi nani matatabuna abame wata fwayefwayeye tomotoga taiadi ta 'awa'idida Yaubada 'wainega, siwe fai Natuna i wafa 'ai lagalagana 'waineye, dayagina i ilolo faifaida, matatabuda ta veiana Yaubada taiadi.

21 We'e 'omi, basenadi yami sauluva wata yami nuanua sakoidi 'waidiega Yaubada 'wa vedumwe'ai'aieni 'wa 'awa'idimi 'wainega. 22 Tutuya de'e Yaubada i veianemi Natuna yana wafa 'wainega. Natunanina i vetomotogaotoga i wafa faifaida bega Yaubada i na vagavaimi i na nawemi mataneye, bega 'omi magemagetami, kebu tamu yami sakona wata kebu tamu 'ami 'eba awavesako. 23 Siwe i lubwainemi yami vetumagana Keliso 'waineye fa'alina, kebu 'wa na venuanaluga, wata kebu 'wa na fetoga. Tutuyanina Iesu Valana 'Atumaina 'wa nogai, 'wa vetumagana Keliso i wafa 'ami 'ita'ita'i faifaina wata 'wa nuani mogitana 'awaie 'ami veuveuta 'atumaidi 'wa na veluagadi Yaubada 'wainega, begaidi ma yami vetumagana 'wa lulukamata. Siwe i lubwainemi yami vetumagananidi fa'alidi i na 'eno'enovi kebu 'wa na baila. Valanina 'wa nogaiga 'akonadi Yaubada yana tomotoga i lu'ivona tomotoga matatabuna 'waidie, we'e yau Faulo a vetofolova faifaina a lalau'age.

S15 Ion 1:18S16 Ion 1:3S17 Ion 1:1S18 Efe 1:22-23
S19 Kolos 2:9S20 Efe 2:16S21 Efe 2:3S22 Efe 2:14-16
S23 Ibu 6:11

Faulo yana folova wata yana veviga Iesu yana 'Aila'a faifaidi.

24 Yau Iesu Valana 'Atumaina a lalau'age, 'ana tovedumwe'ai'ai 'waidiega veviga a veveluagadi faifaimi, siwe veviganidi faifaidi a sosoana. 'Omi Keliso yana 'Aila'a 'alo Tomogona veviga bwaikina i veluagai faifaimi, siwe veviganidi bola i 'eno'enovi, begaidi veviganidi a veveluagadiga 'aku veuveuta, 'waidiega Keliso yana veviga a veve'a'avadi, faifainanina a sososoana. 25 Yaubada i venua'ivineku a vetofolova Keliso yana 'Aila'a faifaimi 'ami 'aivaita faifaina. Yaku folovanina Yaubada yana Vona matatabuna a sisivemagesedi tomotoga 'waimie. Yana Vonanina a lulu'ageyeniga side bani'odi. 26 Basenadi tamu Yaubada yana nuanua givagivana kebu i da lu'ivoneyeni tomotoga 'waidie, givagivana i 'eno'eno i maiga tutuya de'e i sivemagaseni yana tomotoga 'waideye. 27 I sivemageseniga fai nuanuana ta na 'asetai yana nuanuananina givagivana 'atumaiotogina wata magemagetana. Yaubada yana nuanuananina givagivana tomotoga 'ada 'aila'a tulina tulina faifaida side. Keliso i agemi inagemie i miamia, bega 'awaie abame Yaubada yana 'ai'aiwabu magemagetadi i na velemi.

28 Begaidi 'a lalau'age Keliso faifaina tomotoga matatabumi 'waimie, ma yama 'aseta nani tulina tulina faifaidi 'a vevelu'ase'ase wata 'a veve 'waimie. Nuanuama tomotoga 'aitamogana 'aitamogana Keliso taiadi i na miave'itubama i na kumaga bega 'a na vagavaidi 'a na nawedi Yaubada mataneye. 29 Fai nuanuaku tomotoga i na miave'itubama Keliso taiadi, i na kumaga wata i na luku Yaubada mataneye, begaidi ma yaku tokemaiga a toke a folofolova. Keliso toketokeotogina yana toketokena i veleku, 'wainega a folofolova wata toketokenanina i folofolova 'waikuye.

S26 Efe 3:3-6S27 Efe 1:18-19S28 Efe 4:13
S29 1 Kol 15:10